Oor ons
Wat is die Jongerenprojek (JP)?
Jaarlikse uitwisseling
Die Jongerenprojek-reis
Die toer word jaarliks aangebied. Een jaar kom ʼn groep studente uit die Lae Lande na Suider-Afrika vir drie weke, en die volgende jaar gaan ʼn groep Suider-Afrikaanse studente na die Lae Lande vir drie weke.
Daar is ʼn organisasie in elk van die twee wêrelddele wat die onderskeie toere reël en organiseer. Die Jongerenprojeknetwerk (JPN) is verantwoordelik vir die Suider-Afrikaanse toer. Dit beteken dat daar ʼn groep Suid-Afrikaners en Namibiërs is wat ʼn toer vir studente uit die Lae Lande reël. In die Lae Lande is die Stichting Zuid-Afrikahuis Nederland en die Vlaams Zuid-Afrikaanse Vereniging verantwoordelik vir die program vir die Suider-Afrikaanse studente.
Ons visie
Die oogmerk van die Jongerenprojek
Om deelnemers ’n begrip te gee van die onderliggende verhouding wat daar tussen die Lae Lande en Suider-Afrika bestaan – soos in die besonder vergestalt word in die taalbande tussen Nederlands en Afrikaans.
Die hoop is om ’n wedersydse begrip en waardering vir die Europese en Suider-Afrikaanse kulture te ontwikkel, en gemeenskaplikheid tussen Suid-Afrika, Namibië, Nederland en België te bevorder deur middel van ’n reis:
- met ’n sterk akademiese komponent; en
- wat deur skakeling met uiteenlopende organisasies/instansies ’n veelheid perspektiewe aan reisigers bied.
Ons missie
'n Diepgaande begrip van kulturele uitwisseling
Afrikaanssprekende Suid-Afrikaanse en Namibiese studente kry die geleentheid om die volgende te beleef op ‘n toer na die Lae Lande:
- Verken twee lande wat ‘n historiese invloed op Afrikaans en Suider-Afrika gehad het.
- Besin oor Suider-Afrika in die breër wêreldkonteks, en neem deel aan konstruktiewe, kritiese gesprekke rondom verskeie wêreldkwessies.
- Verkry ʼn groter begrip vir die Lae Lande deur middel van lesings en gesprekke oor literatuur, kuns, geskiedenis, die politiek en ʼn verkenning van die sosiale en leefruimte.
Die projek poog om vir die studente uit die Lae Lande aan ʼn verskeidenheid aspekte van Suider-Afrika bekend te stel. Studente sal ’n begrip ontwikkel vir die herkoms, huidige wese en verdere ontwikkeling van Afrikaans as taal en kultuur (of kulture), die sosiale, politieke en ekonomiese ruimtes waarin Afrikaans uitgeleef word en die verhoudinge wat Afrikaans en Afrikaanssprekendes met ander taal- en kultuurgroepe in Suid-Afrika het. Dit word gedoen deur:
- deelnemers aan Afrikaans in al sy variasies en Afrikaanssprekendes (bruin, swart, wit, eerstetaal, tweedetaal, ens.) bekend te stel.
- deelnemers aan die verskillende en dinamiese mediums, plekke en kontekste waardeur en waarin Afrikaans in Suider-Afrika geleef, gestudeer, gewerk en gevier word, bloot te stel.
- konstruktiewe, kritiese gesprekke rondom historiese en aktuele kwessies rakende Afrikaans, Afrikaanssprekendes en hulle kontekste te fasiliteer.
Wie is verantwoordelik vir die organisering?
Die JPN is ’n organisasie wat bestaan uit alumni wat die JP meegemaak het asook ander vrywilligers wat die projek se doel bevorder. Die JPN is getaak daarmee om die Suider-Afrikaanse aflewering van hierdie uitruilprogram te reël. Hierdie verantwoordelikhede sluit in die samestelling, organisering en uitvoering van die program, die fasilitering van gasouers, en skakeling met belanghebbende partye met die oog op befondsing van die program.
Ons toegewyde span
Die dryfkrag agter die Jongerenprojek
DJ Cloete
Voorsitter; streekskoördineerder in Gauteng
Shawna-Leze Meiring
Ondervoorsitter; streekskoördineerder in Kaapstad
Emma Wiehman
Streekskoördineerder in die Boland
Monique Rabé
Streekskoördineerder in Noordwes
Hardus Ludick
Noordwes
Marno Swart
Pretoria